La dumonda cardinala saja, sch' il persunal da segirtad dad auters pajais haja immunitad u betg, declera Bardo Fassbender, professer per dretg internaziunal da l'universitad da Son Gagl. «L'immunitad protegia ina persuna dal dretg internaziunal da persecuziun penala en in auter pajais.» Pli enconuschent è quai tar diplomats u emploiads d'ambassada. Tar talas persunas saja quai reglà precis en contracts dal dretg internaziunal.
Medemamain reglà en detagl saja l'immunitad per conferenzas d'organisaziuns internaziunalas. Il Forum mundial d'economia saja dentant in'occurenza «quasi privata». Uschia dettia nagins contracts dal dretg internaziunal che regleschian sche persunal da segirtad dad auters pajais saja immun u betg.
Cunvegnas singulas cun regenza dad auters pajais
Sch'ils agents dal secret service èn immuns u betg dependa pia da cunvegnas singulas tranter la Svizra e la regenza americana. «En vista a la visita da president Trump vegn jau da quai anora, ch' i saja vegnì fatg ina detga massa da quellas cunvegnas da la vart dal Cussegl federal u dal departament federal da l'exteriur.»
Sch'i dess naginas cunvegnas d'immunitad stuessan questas persunas sa giustifitgar avant ina dretgira svizra. Ch'agents sajan pli spert pronts da duvrar armas per proteger lur president che la polizia svizra, na craja Bardo Fassbender betg. A Washington sajan ins bain conscient ch'ins stoppia agir fitg precaut cun armas en l'exteriur, ès el persvas.
RR actualitad 08:00