Siglir tar il cuntegn

Header

cuntegn

Grischun Tgi tegna pled nua?

Sco usità il prim d'avust, vegnan er quest onn tegnì pleds en las citads, ils vitgs ed en fracziuns. RTR ha fatg ina survista dals pleds en Grischun.

En la chapitala dal Grischun tegna la presidenta dal parlament da Cuira, Anita Mazzetta il pled festiv. Ina oratura dumandada è Magdalena Martullo Blocher. La cussegliera naziunala ha referì gia il mardi a Razén ed oz fa ella il medem a Bravuogn.

Dals umens cristiandemocrats visita oz il cusseglier naziunal Martin Candinas Sedrun e ses collega dal Cussegl dal chantuns Stefan Engler vegn a tegnair il pled festiv a Zernez. Il president da la PCD svizra vegn a discurrer questa saira en Val Müstair.

Oratur da renum internaziunal a Samignun

Er oraturs cun renum internaziunal vegnan en acziun: Uschia discurra l'anteriur minister da l'exteriur da la Germania, Joshka Fischer, questa saira a Samignun.

Ma na betg politichers èn dumandads sco oraturs – er sportists èn dumandads: Selina Gasparin tegna il pled festiv a Lai, Curdin Perl a Malögia e la moderatura da sport, Steffi Buchli, a Vattiz en la Val Lumnezia.

Er ils cussegliers federals èn en acziun

Oz tegna il president da la Confederaziun - Alain Berset il pled tradiziunal dal prim d'avust sin il Rütli. Er quasi tut ils auters cussegliers federals sa maschaidan tranter il pievel: Johann Schneider-Ammann, Simonetta Sommaruga e Doris Leuthard sa participeschan tranter auter mintgamai ad in brunch.

Ignazio Cassis passenta il prim d'avust en il Tessin e tegna in pled a Monteceneri ed in a Lugano. Guy Parmelin sa pretschenta a Payerne en il Vad ed a Bürchen en il Vallais. Sulet Ueli Maurer na vegn betg en acziun, perquai ch'el è il mument a l'exteriur.

RR novitads 12:00

Artitgels legids il pli savens