Ornella Poltéra è la fundatura dal center da cumpetenza per sanadad e moviment a Cuira. Il num 80’20 declera las valurs dal center. Dad ina vart dad avair dapli rendita, damai 80% cun pli pauc sforz da 20%. Il medem vala tar il mangiar, sa nutrir 80% saun e 20% da quai ch’ins vul.
Preparativas per la stagiun da passlung
Tge che saja impurtant per sa motivar dad ir passlung è da star londervi e far pass per pass. Il team da 80’20 cusseglia da prender in u dus lecziuns da passlung, per emprender la tecnica correcta e survegnir tips ed exercizis. Vinavant di Ornella Poltéra ch'i saja impurtant da mangiar insatge cun idrats carbonic sco per exempel ina banana e baiver avunda. Cun chaminar tar la loipa e far exercizis sper la loipa u cun ils skis sa stgauda il corp ed è suenter pront per ir sin la loipa. Durant trenar fai senn da baiver insatge chaud, u avair ina taila enturn il culiez per trair sur la bucca sche las temperaturas èn fitg bassas.
Sa vestgir suenter il princip da tschagula.
Suenter il trenament fai bain da mangiar insatge cun proteins e baiver bler. Per betg survegnir barbagiat fai senn da stender tut il corp.
Boom da passlung cuntinuescha
Stefan Moser, il possessur e manader dal Bananas Sport Shop a Savognin, di ch’il boom da passlung cuntinuescha era quest onn. Probabel saja però da quintar ch’ins haja quest onn in pau pli paucs che fetschian passlung ch’ils dus onns passads, cun quai ch’i na dettia naginas restricziuns da corona pli en ils territoris da skis. Tge che Moser ha constatà è ch’adina dapli uffants entschaivian a far passlung. «Sch’ils geniturs fan passlung, lura vulan era ils uffants far quai», di l’affarist da sport. Quest onn saja allegraivel ch’ins haja survegnì avunda rauba da passlung. Surtut l’enviern passà saja stà grev da survegnir nova rauba cunquai ch’in dals gronds producents da skis da passlung produceschia en il pajais da guerra en l’Ucraina.
Scola da skis Savognin è preparada
La scola da skis da Savognin quinta era quest onn cun bleras persunas che veglian far curs da passlung. Tant sco ils dus envierns passads na dettia quest onn probabel betg, quinta Lothar Künzli, il manader da la scola da skis. Il pli grond saja l’interess stà l’emprim onn da corona 2020/21. La scola da skis haja pudì augmentar las lecziuns da cursa lunga da 100 sin 600 uras. L’enviern passà sajan quai stadas 300 uras, tge che saja però anc adina in plus da 300%, ha ditg Künzli. Il pli dumandà sajan uras da far passlung en il stil classic. Quai haja probabel da far cun il fatg ch’i saja pli simpel per noviz d’emprender a far passlung en il stil classic che d’emprender il stil da skating.
