Fundà l’unic tir istoric dal Grischun han las uniuns da tiradurs da Tavau 1927. Dapi là han Glion, Samedan e Cuira organisà mintg'onn en turnus il tir istoric. Cun la festa da commemoraziun da 500 onns guerra da la Chalavaina l’onn 1999 è il tir da Chalavaina arrivà l’emprima giada en Val Müstair. E dapi il 2016 ha lieu il tir mintg’onn alternond a Tavau e Müstair.
300 tiradurs da l'entira Svizra en Val Müstair
Era quest onn èn passa 300 tiraduras e tiradurs da l’entira Svizra sa participads al tir. En gruppas da sis sa participeschan els en las duas disciplinas 300 meters cun schluppet u 50 meters cun la pistola. Era sche mintgin tira per sasez, il resultat ed il spiert da gruppa èn fitg impurtants. Uschia survegnan las meglras gruppas Grischunas da mintga categoria la standarta da Chalavaina sco premi ambulant. Las meglras gruppas da giast survegnan per in onn las cornas da capricorn. E per ils megliers 10 tregantas e tregants datti in segn da Chalavaina.
- L’uniun da tiradurs Rothenbrunnen ha gudagnà sco gruppa en la disciplina cun schluppet sin 300 meters.
- La societad da tiradurs Liestal da Basilea ha fatg il meglier resultat da gruppa cun la pistola sin 50 meters.
- Primtiradurs èn vegnids Thomas Caviezel da Rothenbrunnen cun schluppet ed Andreas Walli da Küblis cun pistola.
