Per evitar in collaps dal traffic e vias stuppadas en ils vitgs è sco gia ils dis da Pasca ed Ascensiun ussa era da Tschuncaisma vegnì dosà il traffic en il territori tranter las sortidas da l'autostrada Zizers ed Islabella. Tenor Andreas Pöhl da l'Uffizi da construcziun bassa ha uschia pudì vegnir garantì in traffic rudlant sin la N13, e la motivaziun dals automobilists da guntgir da l'autostrada sin las vias chantunalas saja vegnida reducida.
Organisaziuns d'urgenza cun glisch blaua eran preparadas per il grond traffic
Sin basa da las experientschas dals ultims onns han las organisaziuns da glisch blaua posiziunà gia avant il grond traffic lur vehichels en differents lieus da la regiun per pudair agir pli svelt – malgrà grond traffic – en in cas d'urgenza.
Nus partin dal fatg che las organisaziuns da glisch blaua han pudì garantir lur provediment durant l'entir temp.
Traffic da return vegn spetgà dumengia
Tar ils viagiaturs da la Bassa saja popular d'agiuntar in'emna da vacanzas suenter Tschuncaisma. E tras il temp da vacanzas che dura en il territori da la Germania dal sid fin in'emna suenter ils firads suppona Andreas Pöhl ch'i vegnia a dar la dumengia, ils 26 da matg, in'unda pli gronda dal traffic da return.
