Fin il 2021 duess mintga mes'ura passar in tren sin ils trajects principals da la Viafier retica. Quai fiss da Landquart a Tavau sco era en Engiadina. Cun quai vul ins porscher ina buna pussaivladad da pendular. Era la colliaziun da Cuira fin Turitg vegn en futur schlargiada. Per il 2019 è planisà in tren direct da Cuira sur Son Gagl a l'eroport da Turitg.
Ultra da quai survegn la Viafier retica il 2021 novs vaguns e novas locomotivas.
Traffic sin binaris ed en la rait
En las staziuns grondas vul la Viafier retica drizzar en in WLAN. Quel è surtut pensà per ils giasts, ch'els chattian la via a l'hotel ni per infurmaziuns sur dal lieu. En ils trens n'è WLAN anc betg in'opziun. La Viafier retica vul però en futur garantir ina buna colliaziun cun la rait da datas. Ina sfida en quai connex èn surtut ils 117 tunnels en Grischun. La Viafier retica spera sin in'innovaziun tecnica e bunmartgada.
Autos da posta senza manischunz
Quest'emna testa l'uffizi da traffic a Maiavilla il «SmartShuttle». Quai è in auto da posta che va senza manischunz. Quels vegnan dapi l'onn 2016 testads a Sion en il Vallais. Il Grischun è il segund chantun ch'emprova ora quests vehichels. La mira è, ch'il «SmartShuttle» maina la glieud da la staziun da Maiavilla al vitg da Heidi.
RR actualitad 17:00