Giuvens e giuvnas tranter 11 e 26 onns pon sa laschar vaccinar gratuitamain cunter ils papillomavirus umans (HPV). Il meglier temp per vaccinar saja avant 15 onns, lura dovria ins main vaccin, scriva l'Uffizi da sanadad. In link per chattar in termin ha il chantun Grischun purschì.
Ils papillomavirus umans èn fermamain derasads, i vegn schazegià che 70% da las persunas s'infectescha en il decurs da slur vita. ils virus vegnan transmess tras contact sexual. Els pon chaschunar variclas tar las genitalias e cancer en singuls cas. Perquai recumonda l'Uffizi da sanadad grischun ina vaccinaziun. In condom na gida tenor l'uffizi betg da sa proteger, quel è dentant tuttina bun per proteger cunter autras malsognas sco hepatitis B, HIV, clamidias u herpes.
L'Organisaziun mundiala da sanadad WHO classifitgescha la vaccinaziun cunter HPV sco fitg segira. Quai suenter la consultaziun da las datas che stattan a disposiziun davart 270 milliuns dosas dal vaccin dadas sin l'entir mund, e suenter la realisaziun da differentas analisas internaziunalas concernent las ristgas potenzialas.