Siglir tar il cuntegn

Header

cuntegn

Grischun Transports grevs en l'avegnir senza preschientscha da la polizia

En il futur na vegnan transports grevs e surdimensiunads betg pli accumpagnads da la Polizia chantunala. Questa lavur surpiglian las firmas da transport. Pretendì vegn dentant ina scolaziun.

Eduard Gabathuler da la polizia chantunala ha accumpagnà il project da surdar transports grevs a privats.
Legenda: Eduard Gabathuler da la Polizia chantunala ha accumpagnà il project. RTR, Tona Poltera

Enfin ussa stueva la Polizia chantunala accumpagnar transports grevs – en il futur vegnan questas lavurs surdadas a las firmas da transport. Cun in curs ed ina lubientscha valaivla per tschintg onns, dastgan accumpagnaders da transports grevs surpigliar questas incumbensas. En ina fasa da pilot dad in onn sin la via Cuira-Arosa èn vegnidas ramassadas il 2016 experientschas.

Tenor Eduard Gabathuler, ch'ha manà il project po ussa vegnir dà glisch verda als privats da duvrar la glisch oranscha. Excepziuns èn convois, sche vias naziunalas ston vegnir fermadas pli ditg che 20 minutas ni sch'i dat transports excepziunals che pretendan tuttina la preschientscha da la polizia.

Roland Jäggi, president da l'ASTAG Grischun vegn ad esser responsabel per la scolaziun nova dals accumpagnaders da transports grevs.
Legenda: Roland Jäggi, president da l'ASTAG Grischun. RTR, Tona Poltera

Ils curs vegnan organisads da la secziun grischuna da l'ASTAG e per il president Roland Jäggi vegn quai ad augmentar l'attractivitad da la professiun dal chauffeur, ma er augmentar la professiunalitad dals purschiders da tals servetschs – en regla las firmas da transport sezzas.

RR actualitad 08:00

Artitgels legids il pli savens