Questa sanaziun totala vegn fatga, perquai che la via haja cuntanschì sia durada da vita. Quai di il pledader da medias da l'Uffizi federal per vias ASTRA, Eugenio Sapia envers il schurnal regiunal dad SRF. Per mantegnair l’infrastructura e la segirezza datti nov catram, novs sistems da drenascha, novas saivs directivas ed ulteriurs indrizs da segirezza. Quai sin tut ils vials sin ina lunghezza da 5,6 kilometers.
Disturbar il traffic schi pauc sco pussaivel
Talas lavurs chaschunan impediments da traffic, da quai va Andreas Pöhl ora. El è il manader da project dal management da traffic dal Grischun. Durant che l’A13 è in plazzal da fabrica vegn limitada la sveltezza in etappas: da 120 kilometers per ura sin 100 ed alura sin 80. Quai duai reducir ils disturbis. E da princip èn averts dus vials per vart sin l’autostrada. Sch'i duessan ina giada vegnir fatgas lavurs che pretendessan da sviar il traffic u sch'in vial stuess vegnir serrà, alura vegnissan questas lavurs fatgas da notg. En diversas etappas duai l’A13 alura esser sanada dal 2029.
