Siglir tar il cuntegn

Header

cuntegn

Tratga da chauns da protecziun Confederaziun vul surdar la responsabladad als chantuns

A partir dad immediat n'ha l’uniun «Herdenschutzhunde Schweiz» nagina incumbensa pli dad organisar la tratga da chauns. Quai è ina consequenza da la nova lescha federala da chatscha.

Atgnamain leva l’uniun «Herdenschutzhunde Schweiz» (HSH) contrahar avant in’emna davart ina nova cunvegna da prestaziun per suenter l'onn 2025. Il mandat da la Confederaziun d'organisar la tratga da chauns da protecziun ha la HSH gia dapi var 20 onns. Sco ch'il vicepresident da l’uniun ha dentant confirmà a RTR, hai dà enstagl d’ina nova cunvegna ina disditga.

Per ils chauns gia renconuschids da la Confederaziun datti mo contribuziuns enfin la fin schaner 2025. Co i va vinavant suenter quai termin na Urban Lanker, il vicepresident da l'uniun HSH betg savì dir.

Consequenza da la nova lescha da chatscha

Tenor ils plans da la Confederaziun duajan ils chantuns svilupar agens programs da tratga. Ils responsabels da l'Uffizi federal per l'ambient BAFU scrivan sin dumonda:

Il parlament federal ha approva il december 2022 la nova lescha da chatscha. En quella vegnan regladas las cumpetenzas tranter confederaziun e chantuns. Perquai vegni era a dar midadas tar la protecziun da muntaneras
Autur: posiziun a scrit, BAFU

Quants daners che stettian a disposiziun decidia il parlament federal, scriva il BAFU. Per l'onn 2024 sajan quai 7,7 milliuns

Ein Herdenschutzhund mit etwas trauriger Miene.
Legenda: La Confederaziun terminescha per immediat il program da tratga per ils chauns da protecziun da muntaneras. Ils chantuns duain surpigliar la responsabladad. Keystone

Irritaziuns en Grischun

Ils responsabels dal chantun Grischun èn irritads da la decisiun dil BAFU. Enfin ussa n'haja il chantun survegnì nagina communicaziun dal BAFU. Avant ch’il text per la revisiun da l’ordinaziun da chatscha federala na saja betg sin maisa, na saja betg pussaivel da prender posiziun. Quai ha il cusseglier guvernativ Marcus Caduff scrit sin dumonda da RTR.

Da principi savain nus dir che nus spetgain che las mesiras per la protecziun da muntaneras vegnan finanziadas resp. pajadas da la Confederaziun e quai betg cun daners da l’agricultura mabain cun daners ord ils preventivs dal BAFU.
Autur: Marcus Caduff cusseglier guvernativ responsabel

La proposta dal BAFU da terminar la responsabladad per la tratga da chauns da protecziun e surdar quella als chantuns giaja l'avrigl en consultaziun. Quai capita en il rom da la revisiun da l’ordinaziun da la lescha da chatscha. Quella duess ir en vigur cun l’entschatta favrer 2025.

audio
Per tadlar: Curt e cumpact
ord RTR Audio dals 15.01.2024.
laschar ir. Durada: 1 minuta 7 Secundas.

RTR novitads 17:00

Artitgels legids il pli savens