EMS – Ina metoda da sport ch’empermetta dapli musculs en damain temp. Translatà vul la scursanida «EMS» dir tant sco ina stimulaziun da la musculatura tras impuls electrics. Quests impuls vegnan dads vinavant da differentas electrodas che vegnan plazzadas sin l'entir corp durant l'exercizi. Quai vul pia dir, ch'i dovra er in spezial vestgì per il trenament. Quel sto esser stretgamain vi dal corp e sa cumpona d’in material elastic. I sumeglia in pau in vestgì da neopren. Per ch’ils impuls electrics possian vegnir transmess senza incaps, vegn il vestgì fatg bletsch a l’entschatta. Sut il vestgì nair e bletsch porta la persuna anc ina sort vestgadira suten. Uschia declera Rafaela Donati, trenadra e possessura dal center dad EMS a Cuira.
Vi dal vestgì èn plazzads pliras electrodas ch'èn mintgamai colliads cun in cabel. Cunquai ch'i sa tracta d'in trenament cumplet, pia per l'entir corp, èn las electrodas repartidas sin chommas, venter, tgil, pèz e la bratscha. Uschespert ch'il trenament cumenza, survegnan ils musculs in impuls electric, contraheschan e vegnan trenads uschia.
L'entir process dura circa. 20 minutas ed i vegn adina varià tranter 4 secundas impuls e 4 secundas pausa. Per far la chaussa anc pli effectiva, vegn il trenament accumpagnà da divers exercizis da moviment sco p.ex. cun far squats, sit-ups u auzar pitschnas paisas. Tras quai daventa la stimulaziun anc pli gronda. Ma tge è ussa la differenza tranter il trenament classic e quel dad EMS? Rafaela Donati declera:
Cun dar in impuls al muscul vegn quel trenà. Tar il trenament dad EMS pon ins rinforzar quel 2 fin 3 giadas, uschia ch'ils resultats èn correspundentamain era megliers.
Perquai che noss tscharvè na po betg distinguer, sch'in impuls vegn dal corp u sco tar la EMS d'in apparat, è l'effect sin la musculatura la finala il medem, u sco Rafaela Donati di, schizunt pli ferm. I dat studis che conferman quai, ma er tals che vesan la chaussa in pau pli critic. Sco quai che la trenadra manegia, na datti nagins ristgs pli gronds. Sch'ils impuls èn però memia intensivs, po la musculatura vegnir donnegiada e blessada. I na fetschia dentant betg mal, cura che l'impuls va tras il corp, i furmicla simplamain in zic, manegia ella.
Ins na sto definitivamain betg avair tema. I n'èn betg fridas electricas, mabain impuls electrics che van tras il corp. A l'entschatta èsi simplamain in sentiment ester.
Sco Rafaela Donati di n'è la metoda betg adattada per dunnas en speranza u per persunas cun problems dal cor e da la circulaziun. Sper la musculatura duai il trenament era sustegnair las giugadiras, la regeneraziun dal corp sco era durant fasas da reabilitaziun. In crutsch ha l'entira chaussa dentant tuttina: Ins è main flexibel, damai ch’ins è dependent dad in termin ed in coach, ed uschia in trenament custa spert ina giada tranter 50 e 100 francs l’ura. Tgi che vul cuntanscher buns resultats cun EMS, sto era qua star vidlonder ed investir in u l'auter franc dapli.
