Siglir tar il cuntegn

Header

cuntegn

Tribunal federal Cumbat pervia da lieurs da tschigulatta e nums da firma

Lidl sto dismetter sias lieurs da tschigulatta. Ellas sumeglian memia fitg quellas da Linth & Sprüngli. Ina firma turitgaisa sto midar ses num, perquai ch'el sumeglia quel d’ina firma da Maiavilla. Quai èn duas decisiuns dal Tribunal federal.

I na dastga betg dar scumbigls. Gliez vala tant per la lieur da tschigulatta da Linth & Sprüngli sco era per il num d’ina firma a Maiavilla. Il Tribunal federal ha publitgà il settember duas sentenzias che tractan il dretg da marca ed il dretg da nums da firmas. En omadus cas decidan las dretgiras tenor sumegliants criteris.

audio
Dretgs sin in num: lieur da tschigulatta e baulog
ord Actualitad dals 03.10.2022.
laschar ir. Durada: 5 minutas 26 Secundas.

La lieur vala sco marca

Linth & Sprüngli ha registrà sia lieur da tschigulatta sco marca. Il dretg da marca svizzer enconuscha sper marcas da pled u marcas da segns era marcas da furma, sco per exempel la lieur da Linth & Sprüngli.

Il Tribunal federal è vegnì a la conclusiun che la lieur da Lidl sumeglia memia fitg quella da Linth & Sprüngli. «Igl exista il privel da scumbigls, era sch’ils dus products demussian tschertas differenzas», scriva il Tribunal federal en sia communicaziun. L’entira cumparsa da las lieurs da Lidl sveglia associaziuns a la furma da la lieur da Linth & Sprüngli. U cun auters pleds: Tgi che vesa en il Lidl la lieur da tschigulatta, pensa automaticamain a la lieur da marca da Linth & Sprüngli.

Il Tribunal federal dat suatientscha al plant da Linth & Sprüngli: Lidl na dastga betg pli vender sias lieurs da tschigulatta e las lieurs gia producidas sto Lidl dismetter.

Logbau AG e Baulog AG

Sumegliantas ponderaziuns fa il Tribunal federal pertutgant il num da la firma Logbau AG da Maiavilla. La firma porscha servetschs logistics en il sectur da construcziun. Ella ha purtà plant cunter ina firma dal chantun da Turitg che porta il num Baulog Baulogistik AG.

La firma da Maiavilla ha pretendì avant dretgira che la firma turitgaisa midia ses num entaifer 30 dis e desistia da ses logo e da sia domain. Tant la Dretgira chantunala sco era il Tribunal federal han dà suatientscha al plant en bunamain tut ils puncts.

Midar num e cumparsa en 90 dis

Il Tribunal federal conferma en sia sentenzia che la Baulog AG da Turitg stoppia midar ses num, ses logo e la domain. Ella haja dentant temp 90 dis.

Sco en il cas da las lieurs da tschigulatta ha il Tribunal federal constatà ch’ils dus nums Baulog AG e Logbau AG sa differenzieschian memia pauc. Il public pledentà da las duas firmas na possia betg tegnair dapart bain avunda ils dus nums en la regurdientscha.

Damai che la Logbau AG da Maiavilla è sa registrada il 2009 en il register da commerzi e la Baulog AG dal chantun da Turitg pir il 2013, posseda la firma grischuna il meglier dretg e salva ses num, ses logo e sia domain.

RTR actualitad 17:00

Artitgels legids il pli savens