L'advocat viva dapi sia fuigia avant radund 10 onns a Zuoz. Là sa zuppa el da la giurisdicziun da la Germania. Ils 7 da fanadur ha la polizia chantunala grischuna arrestà Hanno Berger. Uss sa chatta el en praschun a Cazas. Il ministeri da giustia da Hessen pretenda da la Svizra l'extradiziun ed il departement da giustia svizzer ha scrit ora la fin da zercladur in cumond dad arrest. Encunter quest arrest protesta Hanno Berger cun tut ils rampins giuridics pussaivels.
Cun ses emprim recurs n'ha el gì nagin success. Il tribunal federal penal a Bellinzona ha refusà ses protest encunter l'arrest. La dretgira ha publitgà sia decisiun il glindesdi. Hanno Berger ha dentant anc pliras pussaivladads da sa dustar cunter sia extradiziun en Germania.
Betg uschè malsauns
El saja malsaun, è stà in da ses arguments cunter l'arrest. Il miedi da Hanno Berger ha attestà ch'el na tegnia betg ora in arrest pli lung. In tal pudessi manar a «donns da sanadad irreversibels u eventualmain a la mort». Indicaziuns concretas davart las malsognas n'ha il medi dentant fatg naginas.
Il spital chantunal ha intercurì l'advocat da 70 onns e confermà ch'el saja bun da tagnair ora in arrest. Sin fundament da gliez refusan ils derschaders da Bellinzona la protesta en quest punct.
Cauziun da 100'000 francs na basta betg
Plinavant ha Hanno Berger fatg amogna ina cauziun da 100'000 francs per ch'el vegni mess en libertad fin al process. Ils derschaders taxeschan questa summa dentant per memia bassa. En Svizra ha Hanno Berger declerà a la taglia ina facultad da 5,5 milliuns francs.
Zuppà milliuns en societads da off-shore
Las instanzas en Germania renfatschan dentant ad el d'avair recaltgà cun sias cugliunarias ensemen cun ses cumplizs 391 millliuns euros. Ses gudogns haja el zuppà en societads dad offshore. Perquai considereschan ils derschaders da Bellinzona la cauziun proponida per memia bassa.
Perfin sch'el fagess amogna tut sia facultad declerada en Svizra sco cauziun, na bastass quei betg sco segirtad, scrivan ils derschaders en la decisiun publitgada il glindesdi.