Il chantun Grischun ha annunzià, che la surveglianza da chatscha dal chantun ha sajettà il fauss luf. Tar il triep da Moesola ha l'Uffizi federal d'ambient, BAFU, gì dà la lubientscha da sajettar dus lufs giuvens. L'analisa genetica mussà che la surveglianza ha mazzà il bab dal triep, ed betg in dals giuvens.
La surveglianza ha tschiffà il bab luf ils 9 d'october, ensemen cun in luf ulteriur. Ils dus lufs èn returnads tar ina nursa stgarpada dal di avant. Tenor sia grondezza e ses cumportament haja el fatg l'impressiun d'in luf giuven.
Mancanza dal bab po periclitar il triep
Il chantun scriva plinavant, ch'ins na sappia betg tge consequenzas che la mort dal bab luf ha per il triep. Per sajettar in animal dominant dal triep valan pli auts obstachels che per lufs giuvens, perquai ch'els èn impurtants per il surviver dal triep. I haja dentant plirs mastgels creschids en il triep.
Preistorgia dal triep da Moesola
Perquai ch'il triep ha chaschunà gronds donns ha il BAFU dà la lubientscha da sajettar dus lufs giuvens dal triep da Moesola. La finamira dal chantun è da midar entras la regulaziun il cumportament dal triep. Per cuntanscher quai duain ils lufs vegnir sajettads enturn ina scossa d'animals da niz ed en preschientscha dad auters lufs.
Sco l'Uffizi federal d'ambient ha scrit en ina communicaziun, haja il chantun Grischun dumandà ils 13 da settember per la lubientscha. Ella spira ils 31 da mars 2023.