Flexibilitad, improvisaziun, planisaziun ed engaschi – da quai vivan las uniuns. Ed uniuns pitschnas forsa anc in zic pli fitg che las grondas.
Cun pauc dapli che 10 commembras e commembers n'hajan ins betg grond spazi d'agir, di il president da la Scarnuzzer gugga Sandro Geyer. Ins stoppia savair cura che tgi saja denturn. Saja quai durant las emprovas, dentant cunzunt era durant ils tschaivers.
Duas da trais trumbettas n'han betg pudì vegnir ed uschia ha l'entira gugga stuì desister dal tschaiver.
Las Fifferlottas da Segnas hajan enfin uss gì cletg e mai stuì dar giu in tschaiver, di lur president Maurus Tuor. Dentant er els stuessan far quai sche per exempel be trais persunas dal medem instrument mancassan.
Ils instruments
Omaduas guggas han reducì lur instruments sin l'essenzial: intginas trumbettas e posaunas, in sousaphon e la percussiun. E cunzunt quai che pertutga lezza han las Fifferlottas stuì esser spezialmain creativas. Ord in instrument han ellas numnadamain fatg dus.
Quest onn avain nus be ina persuna sin la percussiun. Uschia avain gì l'idea da cumprar ina pitschna battaria per er anc pudair sunar il tun da la pauca.
Las chanzuns
Cura ch'els eran pli blers saja stà pli simpel da tscherner las chanzuns, di Sandro Geyer ch'è dapi 10 onns commember da la Scarnuzzer gugga. Perquai ch'els hajan be trais trumbettas che sunian tuttas la medema vusch, saja grev da sunar chanzuns che fan atmosfera da festa.
Las Fifferlottas scrivan savens sezzas lur chanzuns, adattadas a lur gugga. Insumma ha la musica da tschaiver da Segnas il cletg che blers da lur commembers e commembras èn musicals, san leger notas e pon uschia er instruir ils novizs e las novizas che na san anc betg sunar l'instrument.
L'organisaziun dal tschaiver
Enstagl d'organisar il grond tschaiver a Mustér ensemen cun tschella gugga dal vitg, Las Bagordas, fan las Fifferlottas in agen tschaiver pli famigliar e pitschen. Ed era la Scarnuzzer Gugga na fa betg pli tant dapi ch'els èn uschè paucs. Pli baud faschevan els in bal da guggas, mintgamai la saira suenter il til tras il vitg. Dentant, era quai è sa midà ed en consequenza prendan uss pli paucas guggas la via sut ils pes e van al tschaiver a Cazas.
Chalar cun il tschaiver, gliez n'è dentant per omadus presidents nagin'opziun. Malgrà che persunas giuvnas hajan propi betg pli tant interess vi da quest hobi, perquai ch'ellas na veglian betg sa liar, perquai ch'ils exercizis giajan sur mais ed ils tschaivers sajan las fins d'emna, manegia Sandro Geyer.
Tuttina fetschian els vinavant uschè ditg sco ch'i giaja ed haja commembras e commembers motivads ed engaschads en las retschas.
