I dat ellas en differentas colurs, gusts e grondezzas – las lieurs da Pasca. Ellas vegnan gugent surdadas sco regal ad uffants ma era als creschids. Ma intginas dad ellas restan en las curunas da la stizun e na vegnan er betg vendidas.
Nus essan stads en intginas confisarias e pasternarias a Cuira ed avain dumandà sch'els han insumma lieurs da Pasca ch'èn restadas e tge ch'ellas fan cun quellas.
Luar u betg?
En las fatschentas Maron e Merz vegnan las lieurs restadas regaladas a las collavuraturs ed als collavuraturas u ad instituziuns sco la Caritas u surdadas a l'ospital chantunal sin la staziun d'uffants. Anc ina giada luar la tschigulatta e far insatge auter ordlonder na vegniss betg en dumonda, di tant Regula Allamand-Maron sco era Roni Mez.
Or da las lieurs datti tschigulattins
In zic auter guardi ora tar la confisaria e café Caluori. Là vegnan las lieurs sco emprim reducidas per 50% e sch'ellas na vegnan betg vendidas, vegn la tschigulatta duvrada per tschigulattinas. Er en il café Allegra survegnan las lieurs ina segunda vita. Suenter ch'ins ha allontanà tut quai che n'è betg pussibel da luar – per exempel marzipan – vegn la tschigulatta duvrada per novs products. Bittar davent las lieurs, gliez vul numnadamain nagin.
Tge fan Coop, Migros e Volg?
Dapli selecziun e lieurs datti en stizuns grondas. Er là avain nus dumandà suenter ed ils posts da medias conferman che la gronda part dals products da Pasca vegnian vendids. Quai che restia vegnia scrit giu per 50% e tar il Coop marcà cun «Verwenden statt verschwenden». Las lieurs che restan en las stizuns dal Coop e dal Volg vegnan er regaladas ad organisaziuns sco la «Schweizer Tafel» u «Tischlein deck dich». Sco ils posts da media conferman, na vegnan las lieurs betg bittadas davent.