A Tumein ha il suveran approvà il quint 2023 da la vischnanca. Quel serra cun in surpli d'entradas da 370'000 francs tar entradas totalas da 7,1 milliuns francs, scriva la vischnanca en ina communicaziun.
En pli han votantas e votants decidì da schlargiar la zona da tempo 30 sin il territori abità da l'entira vischnanca. Cun quai duai vegnir anc pli segir e ruassaivel en la vischnanca. Pertutgà da quai è cunzunt la via da Reichenau e las vias lateralas. Sin quella via chantunala sajan savens persunas da via a pe. La vischnanca haja perquai vulì bajegiar in passadi da pedunas e peduns, tge ch'il chantun haja dentant refusà.
Plinavant ston manischunzas e manischunz en il futur pajar 24/7 sin parcadis da la vischnanca. La radunanza communala ha approvà d'introducir ina nova taxa correspundenta. Las manischunzas ed ils manischunz che procuran per custs duain uschia er pajar quels.
Per parter aua cun la vischnanca da Domat ha la suprastanza proponì da bajegiar in indriz correspundent. Il credit da 150'000 francs per la construcziun da quella è er vegnì approvà. Ella ha er concedì 40'000 francs per sclerir ina fusiun dals manaschis forestals e communals da las vischnancas Tumein e Favugn.