En il tunnel da segirezza Isla Bella vegn lavurà 24 uras 5 dis l'emna en trais turnus. Il frunt dal tunnel è actualmain in kilometer profund en il grip. Lavurà vegn cun siglientadas, lura vegn il material transportà ora cun cupitgaders. L'arvieut dal tunnel vegn segirà cun ancras en il grip e lura vegn montà betun da sprizzar. La finala è il tunnel da segirezza medem lung sco il tunnel da via, numnadamain 2,5 kilometers.
Tgi che lavura en la construcziun da tunnels fa quai savens per vita duranta. Sabine von Büren fa part da la direcziun da construcziun, ella lavura gia 30 onns en la construcziun da tunnels. I saja grev da descriver la fascinaziun per quella lavur. I saja daventà sia passiun dapi l'emprim plazzal.
Jau n'hai betg studegià, uschia ch'i na restava nagut auter che stumplar la charretta.
Augustino Cusini lavura già 32 onns en la construcziun da tunnels. Vi da sia lavur plaschia tut. Durant l'emna habitescha l'um da 54 onns a Tusaun ensemen cun ses collegas. La fin d'emna turna el a chasa a Tirano tar sia famiglia.
