I dat bler da far cura ch'i va per nettegiar tunnels. Ins na stoppia betg mo nettegiar las vias en il tunnel, di Romano Iseppi, responsabel per la gruppa da tunnels. I dat ina massa lingias en in tunnel, sco per exempel conducts d'aua da sfundrada, conducts d'aua tschuffa ubain conducts d'aua da muntogna. Questas lingias ston era vegnir nettegiadas.
Sch'ils bischens èn memia tschufs u cuntegnan memia blera chaltschina, poi esser ch'els sa staupan.
Uschia pudess l'aua bittar or d'in tumbin enavos en il tunnel. Quai è in privel ch'ins stoppia evitar.
Incumbensas dal team
Tar las incumbensas dal team tutgan tranter auter il mantegniment dal manaschi da tut ils tunnels da la via chantunala e da la via naziunala, controlla e lavurs da mantegniment, conducts da drenascha, conducts da sfundrada e conducts da transport cun collecturs da glitta. I dat pia avunda da far.
Cura ch'ins va cun l'auto tras il tunnel ha forsa ina giada dà en egl ch'il passape è avert, sco ina sort chanal. Quai è ina funcziun speziala. Sch'i dat in accident, crodan parts da l'auto en questa lingia. Ma betg mo quai: Tut quai che vegn bittà da fanestra or durant ir en il tunnel sa tschenta en quest chanal. Adina puspè chattan ils umens chadainas a diever unic che crodan davent. È Jeremias Lareida, il schef d'equipa dals sis umens, ha gia chattà dal tut.
Numers d'auto ed er portavelos hai jau gia chattà.
Per regla vegn mintga tunnel schubregià ina giada l'onn. Tut tenor grondezza dura quai per in tunnel pitschen circa quatter notgs e per in tunnel pli grond schizunt fin a trais emnas.
Sch'ins vesa pia ch'in tunnel è serrà la saira da las 22:00 fin la damaun marvegl, èsi fitg probabel ch'il team da Romano Iseppi e Jeremias Lareida è vid la nettegiada.
