Ils ultims 30 onns è il dumber dad hotels en il Grischun sa reducì per 30%. Tuttina saja il dumber da letgs restà medem en questa perioda da temp. Quai ha il president da Hotelleriesuisse Grischun Ernst Wyrsch ditg a la radunanza da delegads ch'ha gì lieu en l'Alpengold Hotel a Tavau.
Malgrà che quests letgs sajan be occupads moderà durant l'onn, vegnia investì milliardas en immobiglias ed infrastructura – e quai betg be en regiuns sco San Murezzan, Tavau u Arosa, mabain er en regiuns pli pauc centralas sco San Bernardino u sisum la Surselva. Daco? Tenor Wyrsch haja il Grischun in grond potenzial a lunga vista sco regiun turistica, era perquai ch'il Grischun è bain accessibel dals pajais vischins. Uschia quintan ils investurs che questas investiziuns vegnan a render a lunga vista.
Midadas en la suprastanza
Cunquai che Christoph Schmidt è vegnì elegì sco president communal da Flem, sa retira el da la suprastanza da Hotelleriesuisse Grischun. Reto Gurtner è vegnì elegì sco commember d'onur per ses 20 onns en suprastanza, sco era per ses engaschi per Laax en il turissem.
Da nov en suprastanza èn Janine Arpagaus dal Berghuus Radons, Julian Matthijssen da NextGen Tourism Board ed il hotelier da Flem Hannes Ingold.
