Quellas e quels ch'èn adina puspè en vischinanza da la staziun a Cuira san sco ch'i tuna cura ch'il «Arosabähnli» arriva u parta da la staziun da Cuira. La «pitschna cotschna» s'annunzia mintgamai cun ina detga canera cura ch'ella arriva da u parta vers Arosa.
En il tren hai anc bleras plazzas libras, uschia era en il vagun ch'è pensà per famiglias. Las paraids coluradas cun maletgs d'urs, baus ed auters animals envidan da giugar «Jau ves insatge che ti na vesas betg». Quel gieu procura almain ad ina famiglia ch'è da viadi ad Arosa per curturella durant il viadi da passa in'ura tras la natira verda da stad. Il pèr rumantsch ch'è sin via cun la figlia d'ina confamigliara han in plan concret per il di. Els van a la tschertga dals urs e stgilats.
La Viafier Retica sa serpegia tras chavorgias e passa sur punts da crap ed il renumà viaduct da Langwies. Bainbaud essan nus arrivads al lieu da destinaziun.
Grad sper la staziun mainan pliras stgalas rullantas ertas si tar l'entrada da la pendiculara. Arosa para gist d'esser per Grischunas e Grischuns in lieu dumandà per far ina excursiun d'in di. Uschia er ina dunna da Cuira ch'è da viadi cun la famiglia ed amias en direcziun dal «Bärenland».
Nus essan da Cuira e quai è per nus ina bella excursiun d'in di. Uschia che nus pudain giudair in pau las muntognas ed il guaud.
Tar la staziun da mez sa spartan las visitadras ed ils visitaders. Quellas e quels ch'èn da viadi cun il velo da muntogna direct en la proxima pendiculara per ir sil Piz Alv. Las persunas ch'èn en gir cun bastuns da viandar van in pau en tuttas direcziuns. E surtut famiglias cun charrotschas ed uffants pitschens van vers il refugi dals urs, ch'è mo in pèr pass davent da la staziun da mez.
I buffa in ventin frestg e curt suenter dat il sulegl puspè. Quai sa repeta l'entir di.
Ins auda surtut vuschs en dialect tudestg, bler grischun, ma er da la Bassa. Quella impressiun ha er Vreni Schmid. La dunna cun in rir cordial, porta in t-shirt verd cun si in urs e venda ils bigliets per il «Bärenland».
Il mument avain nus dapli giasts da la Svizra, ma jau sent schon che nus avain, cumpareglià cun ils ultims onns, er puspè dapli giasts da l'exteriur.
Ad ella pari ch'i haja en general pli paucs giasts ch'ils ultims onns. Il dumber d'uss saja dentant stà normal avant il temp da pandemia. Ella pensa ch'ins giajan probabel puspè pli savens en vacanzas en l'exteriur. Ed ils ulteriurs plans da vacanzas da stad dals giasts svizzers ch'èn da viadi quel di ad Arosa, paran da confirmar quai. Dal Lago di Garda en Italia, sur Grezia – cun resalva da la situaziun dals incendis – fin il Tirol dal Sid e l'Ollanda, per numnar mo intginas da las ulteriuras destinaziuns per il proxim temp.
I dat dentant er quellas e quels che passentan la gronda part da las vacanzas en patria. Uschia sco ina dunna da la Tumleastga cun chavels alvs e chalzers da viandar brins, ch'observa ils urs giu da la plattafurma da lain.
Nus essan enfin uss mo stads en Grischun. Nus avain qua uschia bellas chaussas che nus savain far.
Ella saja fitg gugent da viadi en Svizra, i dettia uschia bler da far e bleras chaussas ch'ella na haja anc adina betg vis. Ed ella giaja er fitg gugent a viandar.
Il viandar e la natira grischuna para er d’attrair giasts da l'exteriur, sco quella famiglia cun quatter uffants ch'è da viadi tar la plazza da gieu. La dunna cun chavels nairs è oriunda da New York, ses um saja naschì ad Amsterdam, uss stettia la famiglia dentant en Israel. Els vegnian schon plirs onns adina puspè en vacanzas qua per giudair las bellas cuntradas e l'aria frestga.
Plaunsieu vegni temp da turnar enavos en vischnanca. Per far passar il temp enfin ch'il proxim tren parta per Cuira, visita nossa reportra anc curtamain in'ustaria sper il lai ch'è bain visitada, per guardar sco che las persunas che lavuran là resentan questa stad. Il mainafatschenta manegia ch'il bonus da pandemia saja ussa passà. I saja anc adina bun, dentant pli dependent da l'aura che avant.
Ma il Grischun e grad Arosa paran d'avair lur fans fidaivels, che turnan adina puspè. Ed en spezial ils urs paran d'esser magnets che vegnan probabel ad attrair er en futur giasts da lontan e manaivel.