Ils territoris da skis pitschens e mesauns en il Grischun Central quintan pli pauc che l’entira branscha en Svizra sto serrar, sco capità ils 13 da mars. Quai saja strusch il cas ord raschuns economicas, ha ditg Mario Davatz da la nova marca KMS Grischun. Pli fitg temian els bloccadas localas u regiunalas.
Perquai han ils responsabels dals territoris da skis discutà in agid vicendaivel – en il cas ch’in u plirs da lur territoris da skis stuessan serrar. Lura pudessan skiunzas e skiunzs ch’han ina carta da stagiun da quests territoris, ir en ils auters territoris cun skis. Sche tut ils territoris ston serrar, lura s’occupa mintga interpresa da ses clients.
Ils 16 territoris da skis pitschens e mesauns porschan a lur clientella la pussaivladad, da cumprar tar las interpresas partenarias cartas dal di per mez pretsch.