Cun la branscha da turissem na gieva quai avant diesch onns e dapli betg uschè bain. Ella era en ina crisa. Las raschuns per la crisa eran diversas, ha l'expert da turissem Roland Zegg ditg en l’intervista cun il schurnal regiunal da SRF. Pervi dal ferm franc svizzer èsi vegnì per giasts internaziunals pli char da far vacanzas en il Grischun.
Però han tenor Zegg era structuras internas giugà ina rolla en la crisa. Suenter ina lunga fasa da prosperitad n’haja la branscha betg pli vulì far refurmas. Ins pudess dir ch’il motor per muventar insatge haja mancà.
Igl ha dà memia pauc squitsch per far refurmas.
Spert ed innovativ sco catalisatur
Per chattar la via ord la crisa ha il turissem grischun dà gas ed è vegnì pli innovativ ed avert envers refurmas, di Roland Zegg ch'è il fundatur dal Forum da turissem da las regiuns alpinas, ed è dapi onns schef d’ina interpresa che cusseglia fatschentas aifer il turissem. Tenor el datti plirs exempels ch’hajan gidà a vegnir ord structuras pli pitschnas a las cifras da record actualas:
- la fusiun da las pendicularas Arosa e Lai
- las pendicularas da Tavau ch’han cumenzà a cumprar e manar hotels
- il Rocks Resort a Laax sco nov model d’alloschi
Impurtantas innovaziuns turisticas han lur origins en il Grischun.
Pandemia sco catalisatur per innovaziun e refurmas
Suenter ch’il spiert d’innovaziun è stà sveglià, è la pandemia da corona arrivada. En sasez è il turissem puspè stà en modus da crisa, però ha quel temp er purtà schanzas, di Zegg. Blers Svizzers e bleras Svizras hajan puspè emprendì d’enconuscher l’atgna patria per far vacanzas, uschia ch’il Grischun ha pudì nudar bunas cifras. Igl è era stà quel temp ch’il Grischun ha puspè dà paisa a sia regiunalitad e fatg reclama cun lezza. Tenor Roland Zegg ha la pandemia quatras dà al turissem en il Grischun nunspetgadamain in stausch.
Perspectivas optimisticas per l'avegnir
Malgrà l’ intschertezza economica actuala guarda Roland Zegg optimisticamain en l’avegnir. La branscha haja emprendì da sa muventar en temps da crisa. Ils success dals ultims onns demussian ch’il turissem grischun saja sin buna via per surmuntar er las sfidas futuras.