I saja natiral ch'il trend da la genealogia conquisti quasi er il turissem, di Onna Rageth da la FHGR envers il schurnal regiunal dad SRF. Ella è manadra da projects a l'Institut per turissem e temp liber da la FHGR. Il Grischun saja per part stà pertutgà fermamain dad undas d’emigraziun – per exempel en il 19avel tschientaner. Igl dettia pia in u l'auter Grischun enturn il globus che haja interess da savair, nua che sias ragischs sajan. Quai pervia da lur num da famiglia ni er il prenum.
Autras destinaziuns dumandadas
Sch'insatgi fetschia il viadi en il Grischun per scuvrir ils fastizs dals perdavants, na visitia quella persuna betg exnum las destinaziuns classicas turisticas grischunas. Sch'i giaja per sfegliar en documents vegls sajan definitivamain dumandadas autras destinaziuns. Tenor Onna Rageth saja la speranza ch'in possia quasi far il pass da l’immaterial – pia da las istorgias savens er raquintadas a bucca – tar l'experientscha materiala al lieu. Tendenzialmain dettian persunas che sajan da viadi sin ils fastizs da lur famiglia ora dapli raps al lieu, quai demussian differents studis. Las persunas sa sentian meglier, ed i tutgia l’emoziunalitad.
Quels che visitan il Grischun sin ils fastizs da lur perdavants na vegnan betg mo ina giada, els vegnan adina puspè. Ord vista turistica è quai da gronda valur.
Actualmain lavura la FHGR vi d‘in studi che perscrutescha ils desideris e las spetgas da giasts cun interess al turissem da perdavants. Ils resultats duessan demussar tgeninas gruppas en mira ch'èn spezialmain affinas per viadis da genealogia en Svizra. Plinavant sur tgenins chanals che quellas persunas s’infurmeschan e tge cuntegns che muventan il pli fitg. Sin basa dals resultats planisescha il team da project ensemen cun destinaziuns da pilot da sviluppar emprimas purschidas digitalas ed analogas per quels e quellas che sa mettan sin viadi sin ils fastizs da lur perdavants.
