Turitg ha mustgas da la Repower

Las Ovras electricas dal chantun Turitg vulan sa participar vid il concern d’energia Repower. Quai ha l’uffizi da cartel da la Germania confermà vers il portal online «energate».

la centrala en la Val Puschlav. Bild in Lightbox öffnen.

Legenda da maletgs: La Repower sa chatta en in process da midada - La centrala da la Repower en la Val Puschlav. RTR

Sursiglir cuntegn supplementar

Las EKZ

Las ovras electricas dal chantun da Turitg

  • furneschan a 174 vischnancas e firmas da provediment dad energia en il chantun Turitg
  • han 1’405 collavuraturs
  • han vendì dal 2014/2015 5’480 uras gigawatt electricitad
  • èn participadas cun 18,45 a l’Axpo
  • èn per 18,3% en possess dal chantun Turitg

Quant gronda che la participaziun da las Ovras electricas dal chantun Turitg è, n’è betg enconuschent. L’uffizi tudestg examinescha tals cas be sch’i sa tracta d’ina participaziun da passa 25%.

La cumissiun da concurrenza svizra – la CumCo – n’è anc betg infurmada da la cooperaziun planisada – sco ina pledadra ha ditg.

Repower e EKZ queschan

La Repower ha annunzià oz bunura da vulair sa posiziunar da nov e ch’i dettia discurs cun las Ovras electricas dal chantun Turitg. Dapli n’ha il concern betg tradì.

Sin dumonda da l'agentura da novitads svizra sda respunda il pledader da medias da la Repower, Werner Steinmann, ch'i sa tractia tar la communicaziun «ad hoc» a las medias dad in'obligaziun da la bursa.

Era las Ovras electricas dal chantun Turitg n'han betg commentà en detagl ils plans per ina participaziun. Be tant: Els hajan definì sco strategia d'aquistar novas participaziuns - cun tgi e quant saja dentant confidenzial.

Cifras cotschnas mettan sut squitsch la Repower

Fatg è dentant che era la Repower è, sco bunamain tut ils concerns d'energia, sut squitsch pervi dals bass pretschs d'electricitad. L'onn passà ha l'interpresa fatg ina perdita da 136 milliuns francs. Il december ha Repower instradà ina strategia nova. Ils discurs stettian en connex cun quest process da midada, uschia ha confermà Repower.

Ina midada che la Repower aveva annunzià cun eventualas venditas, la concentraziun sin las fieras Svizra ed Italia ed era da sviluppar la firma che producescha e venda electricitad en ina firma che porscha prestaziuns da servetsch en il champ d'energia, scriva la Repower.

RR novitads 12:00+