Trais persunas sesan en la suprastanza, la regenza da Cuira. Be trais persunas al timun dad citad cun passa 40'000 persunas ha dentant adina puspè procurà per discussiuns – sco uss dacurt. La suprastanza aveva prendì posiziun davart in'incumbensa ord il parlament d'augmentar il dumber. En lur rapport tar l'incumbensa d'auzar la grondezza aveva la suprastanza scusseglià da far il pass da schlargiar il gremi. Quai per differentas raschuns:
- I custass bun in milliun francs per ils biros ed ils collavuraturs e collavuraturas ch'i duvrass en pli.
- I fiss pli cumplex pervia dad ina nova repartiziun da departaments che funcziuna uschia sco ella è ussa gia bain, sco il cussegl da la citad scriva.
- Plinavant vegn argumentà ch'i dettia era autras pussibilitads da schliar sfidas ch'i dettia ussa pli simpel. Uschia propona la suprastanza d'introducir persunas da stab che sustegnan ils cussegliers – per exempel tar dossiers e decisiuns.
Reparter las incumbensas sin dapli spatlas
Tino Schneider da la partida il Center, ch'era part dals parlamentaris ch'han inoltrà l'incumbensa, aveva ditg envers il schurnal regiunal da SRF, ch'el na chapeschia betg tut quests arguments. Tenor el fissan ils raps bain investids. Il sistem cun dapli persunas en la regenza funcziuneschia era senza problems en autras citads dad ina sumeglianta grondezza.
Latiers saja el da l'avis ch'ins pudess uschia reparter meglier las forzas, i dess ina meglra represchentaziun da la citad ed ins pudess medemamain schliar meglier la sfida da la substituziun en cass ch'in cusseglier croda ora per in temp. Uschia èsi era stà il cas avant in onn cura che la cussegliera da la citad Sandra Maissen era crudada ora per in pli lung temp. Era questa situaziun haveva manà al giavisch da divers parlamentaris d'auzar il dumber.
Decisiun croda il parlament
Il cussegl communal da Cuira, il parlament, vesa quai sumegliant sco Tino Schneider. Il parlament ha refusà la proposta da la suprastanza da mantegnair il dumber actual da trais commembers en l'executiva. La decisiun è crudada cun 14 cunter 7 vuschs. Ils motivs principals per questa decisiun ch'èn sa mussads durant la debatta èn la populaziun creschenta da la citad, l'augment da las incumbensas administrativas e la cumplexitad pli gronda dals projects politics.
La suprastanza sto uss elavurar in messadi per schlargiar il gremi sin almain tschintg commembers a partir da la perioda da legislatura 2029 fin 2032. Per installar novas persunas e novs departaments sto vegnir adattada la constituziun da la citad. Quai vul er dir che la populaziun sto dar ses consentiment a la midada. Quai vegn a capitar suenter ch'il parlament ha tractà e confermà il messadi che la suprastanza elavura uss.