Tuttina nagin candidat verd-liberal per la regenza grischuna

Avant trais emnas hai gì num ch’era ils verd-liberals preschentian in candidat u ina candidata per las elecziuns da la regenza da l’auter onn. Ussa datti dentant nagin candidat.

Purtret dal president dals verd-liberals Gaudenz Bavier. Bild in Lightbox öffnen.

Legenda da maletgs: Il president dals verd-liberals Gaudenz Bavier. RTR, Gian Carlo Candinas

Josias Gasser aveva studegià da candidar per la regenza grischuna. Ord motivs privats ha el dentant desistì sin la candidatura. Uschia n’haja la direcziun da partida verd-liberala betg chattà in candidat u ina candidata adattada, di il president Gaudenz Bavier. E prender in candidat che fa mo in pèr millis vuschs na fetschia nagin senn.

Sa concentrar sin las elecziuns dal Cussegl grond

La finamira saja da daventar ina fracziun en il Cussegl Grond, di Gaudenz Bavier. Il mument èn dus deputads verd-liberals en il Cussegl grond, Jürg Kappeller e Walter von Ballmoos. Per ina fracziun dovri dentant tschintg persunas. Uschia sa mettan sper ils deputads actuals era anc Josias Gasser, Gaudenz Bavier, Lorenzo Heis e Géraldine Danuser a disposiziun per recaltgar in sez en il Cussegl grond. Ulteriuras nominaziuns pon anc suandar.

RR actualitad 12:00