La primavaira ha l'Uffizi da sanadad communitgà ch'i dat ina midada al timun. Il manader da l'uffizi, Rudolf Leuthold, va suenter 26 onns en pensiun. A l'entschatta da sia carriera ha el studegià economia e construcziun da maschinas, suenter ha el tranter auter lavurà tar l'interpresa Hamilton. Ina gronda part da sia carriera ha el dentant deditgà a sia lavur tar il chantun Grischun en l'Uffizi da sanadad. Dapi l'onn 1999 ha el quest post. Da tut quests onns sajan quels durant la pandemia da corona stads ils pli pretensius. Sco quai che Rudolf Leuthold ha ditg envers il schurnal regiunal da SRF ha el dentant regurdientschas positivas da quest temp.
Las reacziuns spertas ch'i ha pretendì durant la pandemia, la prontadad da gidar da la populaziun e dal persunal da sanadad, quai tut ha fatg impressiun.
En ils en tut 26 onns quinta Rudolf Leuthold la protecziun da nunfimaders, la reducziun da las premias dals custs da sanadad ed era la finanziaziun dals ospitals tar ils success da ses team ed el. Ina chaussa che na saja dentant betg gartegiada, è da persvader la glieud da l'impurtanza da l'atgna sanadad. El vesia adina dapli uffants cun surpais. Il problem vesa el tar l'industria da dultscharias ed era ch'il tscharvè vesa zutger sco paja.
Sfida futura: ils ospitals en il Grischun
Rudolf Leuthold è da l'avis che las dumondas politicas pertutgant ils ospitals en il Grischun daventian en l'avegnir ina sfida. D'ina vart la finanziaziun, da l'autra era la segirezza dal provediment sch'ins guarda sin il svilup demografic. Pli lunsch ch'ins va davent d'in center, pli paucas persunas datti che emprendan ina tala professiun. Uschia ins haja da far la dumonda sche autras professiuns pon surprender incumbensas da medis e medias. U sch'ins ha d'adattar las cunvegnas da prestaziun al persunal che stat a disposiziun. Davart talas dumondas discuta e decida a partir da l'october Sandra Stöckenius, ella surprenda il post sco manadra da l'Uffizi da sanadad.
