L'onn passà han 14% dapli persunas survegnì in cumond da pajar che anc il 2022. Quai saja in svilup remartgabel, ha l'uffizi da scussiun e concurs da la regiun Plessur communitgà. En tut ha l'uffizi tramess 11'049 cumonds da pajament e realisà 6'035 stumaziuns (Pfändungen). Passa 15 milliuns francs debits èn plinavant vegnids retratgs e pajads als crediturs. Er per l'uffizi da concurs è l'onn 2023 stà cun 71 novas proceduras da concurs in onn activ.
L'uffizi da scussiun e concurs – ch'è responsabel che las obligaziuns finanzialas en la regiun Plessur vegnan ademplidas – ha serrà l'onn 2023 cun in surpli da 280'000 francs. Cumpareglià cun l'onn 2022 saja quai in augment significant ed in segn per l'effizienza da l'uffizi, hai num en la communicaziun. Ils responsabels stiman che il dumber da cumonds da pajar sco er concurs vegn a restar auts en l'avegnir. Perquai emprovia l'uffizi da far tut ils process pli simpels ed innovar tschertas regulaziuns giuridicas.