Per l’ultima giada ha la Werkstatt a Cuira fatg festa. Da la partida eran var 300 fans da la bar plitost alternativa da tut las generaziuns. Ma tut en tut eri ina saira tipica per la bar da cultura: musica live, discussiun ed igl era in atmosfera plitost famigliara.
Sche las paraids pudessan quintar istorgias
Diversas uras han ils clients stabels da la Werkstatt passentà en lur bar. Regurdanzas datti avunda. Per exempel datti l’istorgia dal chamel en la bar, raquinta ina visitadra cun in rir. Ella sa regorda che durant tschaiver saja vegnì in schaic cun ses chamel a ballar ed a far festa. Però tut las istorgias n’han els betg vulì tradir.
In local da boulder cun in'ufficina da velos
Suenter 16 onns serra la Werkstatt a Cuira sias portas. Quai causa ch’ils possessurs da la bar èn bancrut. La Werkstatt è daventà in center da cultura a Cuira. Numerus artists locals sco era internaziunals han fatg preschentaziuns en il local en la citad veglia.
Battaporta ha dumandà ils davos visitaders tge ch'els faschessan gugent or da la Werkstatt.
