-
Bild 1 von 8Legenda: Dasper salsiz senza salamuira porscha Alpenhirt er pulvra ed ieli da chonv. RTR, Gierina Gabriel
-
Bild 2 von 8Legenda: Las prescripziuns per ils martgadants èn relativ strictas. RTR, Gierina Gabriel
-
Bild 3 von 8Legenda: Senza THC – ils products da chonv dad Alpenhirt. RTR, Gierina Gabriel
-
Bild 4 von 8Legenda: Tastgas da Kambodscha or da vegls satgs da farina u ris. RTR, Gierina Gabriel
-
Bild 5 von 8Legenda: Multiculti – il stan da la butia dal mund. RTR, Gierina Gabriel
-
Bild 6 von 8Legenda: Martin Casaulta da Lumbrein venda latg nursa cun il label da demeter. RTR, Gierina Gabriel
-
Bild 7 von 8Legenda: Per gourmets – ils ovs quacra dals Gislers. RTR, Gierina Gabriel
-
Bild 8 von 8Legenda: Fa part dapi 20 onns – il mazler Linus Tomaschett da Surcasti cun ils spinals. RTR, Gierina Gabriel
«Bun, burgais, puril, tradiziunal e frestg», uschia descriva il president dal martgà emnil, Stefan Walter la fiera. Quai na para betg d'esser sa midà aifer ils 30 onns: I dettia in bun slogan da reclama che valia analog era per il martgà da purs: «Tut vegn meglier, il martgà da purs resta bun.» Gia dapi l'entschatta sajan ins restads regiunals cun prescripziuns relativ strictas quai che pertutgia ils martgadants.
Nus avain statutas ed in reglament da martgà che defineschan precis tge che nus pretendain.
Sco emprim vegnia il martgadant prendì si be per in onn. Durant quest onn vegnia il manaschi visità da tschertas persunas, che controlleschian che las prescripziuns sajan ademplidas. «Suenter in onn vegn il manaschi lura prendì si definitivamain u betg.»
Salamets d'asen u spinals
Legums, fritgs, charn, chaschiel e fluras – quai èn ils products tipics ch'ins chatta sin martgads emnils. Tgi che guarda in zic pli exact chatta tranteren era products creativs u schizunt unics. Uschia datti per exempel sin in stan da la val Calanca salamets da portg selvadi u asen. «Portg selvadi è quai che nus vendain il meglier qua», declera Dorothea Rigonalli. Insumma – vid products da charn spezials na manchia betg. Era il mazler Linus Tomaschett da Surcasti ha da porscher in – numnadamin il spinal. «In spinal na pon ins betg cumprar. Quai è ina cotletta tagliada gross cun la charn-portg. Ella vegn cundida e setgentada lev.» Duvrar sappian ins spinals per far schuppa u simplamain servir ella cun bagiaunas ubain cun crut asch.
Latg chaura da demeter
Betg dalunsch dal mazler anflan ins latg che vegn era giu da la Surselva, da Lumbrein. Martin Casaulta na venda dentant betg simplamain latg da vatgas, mabain latg nursa. Ils products portan era il logo da demeter. «Sch'ins è disà cun latg vatga, lura gusta latg nursa in zic pli concentrà. El cuntegn dapli grass e dapli alv d'ov.» Ins na possia dentant betg cumparegliar il gust cun quel dal latg chaura.
Ovs da quacra e products da chonv
Lura datti era insatge per ils gourmets – ovs da quacra. Quels anflan ins tar il stan dals Gislers che vendan primarmain spargias e fritgs. Tar il Alpenhirt datti era in product modern. Dasper ils salsizs datti products da chonv. «Nus avain in ieli da chonv. Ord ils rests ch'i dat cun smatgar ils sems datti lura pulvra da chonv. Quella pon ins duvrar per il smoothie, metter en il jogurt u müesli ubain perfin sco supplement per far paun», declera Barbara Hirt. Effects n'haja quai nagins, perquai che tut saja senza THC.
Tastgas orda Kambodscha
Denter tut ils stans da victualias anflan ins il stan da la butia dal mund cun chaussas da l'entir mund. Dasper ielis e spezarias da l'Africa u Palestina era tastgas da Kambodscha – fatgas or da vegls satgs da ris u farina.
RR actualitad 07:00