Gronda festa sin la plazza Arcas
Il sulegl è sa barattà cun la plievgia durant l'emissiun dad SRF «Donnschtig-Jass» la gievgia saira. La truppa naziunala dal jass ha fatg in stop en la chapitala grischuna. La plazza Arcas è stada fullanada cun glieud. Sco il moderatur Roman Kilchsperger ha manegià na chapeschia el betg pertge che usche blers Grischuns abiteschian a Turitg. L'umorist Claudio "Zucco" Zuccolini ha lura explitgà la chaussa e giugà ensemen cun Roman las figuras da Gian e Giachen. Ni sco els dian: Tschan e Tschatschen.
Tranter en è era anc vegnì dà jass da differenza. Per il Grischun nunusità: cun cartas da jass tudestgas. La vischnanca da Küsnacht ha gudagnà encunter la vischnanca da Bonstetten.
Preparaziuns intensivas
Gia ils davos mais è vegni fatg insaquantas preparaziuns. Ma cunquai ch’i è pir definitiv dapi in’emna ch’il «Donnschtig-Jass» vegn a Cuira, ha il comité d’organisaziun uschia stuì far grondas stentas ils davos dis. Gia il glindesdi han cumenzà las lavurs da construcziun.
-
Bild 1 von 5. Il bler è gia pront per l'emissiun dal 'Donnschtig-Jass'. Bildquelle: RTR, Gian Carlo Candinas.
-
Bild 2 von 5. I vegn anc lavurà vid ils davos detagls. Bildquelle: RTR, Gian Carlo Candinas.
-
Bild 3 von 5. Era il 'Hau den Lukas' è gia pront sin la plazza dal Arcas. Cun quest apparat vegn mintgamai eruì il trumf. Bildquelle: RTR, Gian Carlo Candinas.
-
Bild 4 von 5. Il suentermezdi tar la prova generala. Bildquelle: RTR, GIAN CARLO CANDINAS.
-
Bild 5 von 5. En il fanshop dal «Donnschtig-Jass» datti da cumprar dal tut. Bildquelle: RTR, GIAN CARLO CANDINAS.
L’entir di è turbulents, betg mo la saira
Suenter plirs dis da preparaziun è oz finalmain il di d'emissiun. Gia l’avantmezdi gira bler sin l'Arcas a Cuira. Tecnicists èn vid mirar che tut è pront per l’emissiun. Auters lavurers coordineschan che tut las installaziuns èn el dretg lieu.
Adina puspè chattan era turists la via sin il plaz. Ils blers cun in apparat da fotografar. Per ils turists svizzers è cler tge festa che ha lieu questa saira. In zic pli gronds egls fan turists da l'exteriur. In pèr da la Germania è vegnì sin la plazza Arcas ed era tut surstà: «Ist wohl irgend ein Fest hier», ha l’um ditg a sia dunna.
Da las provas e la prova generala dal suentermezdi
Per ils fans hai perfin in fanshop
Fanatichers dal jass e da la emissiun «Donnschtig-Jass» datti dentant blers. Uschia vesan ins gia uras avant l’emissiun bleras persunas cun t-shirts u chapitschas dal «Donnschtig-Jass». In fan passiunà è Fritz Gast (71) dal Emmental. El visiti mintga emissiun.
Visitar il Donnschtig-Jass è ina gronda passiun.
Per ils numerus fans datti perfin in fanshop. Là datti da cumprar t-shirt, sientamauns, chapitschas u era etuis per il telefonin.
Questa saira quintan ils organisaturs cun fin 1'000 aspectaturs sin la plazza Arcas a Cuira. L'emissiun vegn emessa directamain davent da las 20.05 sin SRF1.
RR actualitad 11:00