Ulteriur Grischun - Domat conceda credit da projecziun per sanar Via Nova
Il cussegl communal da Domat ha concedì cun 13 cunter 2 vuschs in credit da projecziun da 45'000 francs per sanar la Via Nova. Il parlament ha era prendì enconuschientscha da l'aboliziun da la decisiun pertutgant la transfurmaziun dal transit local.
Legenda:
La via principala tras il vitg da Domat che duai vegnir sanada (maletg d'archiv).
RTR, M. Candrian
Plinavant ha il cussegl communal concedì dus credits supplementars da mintgamai 5'000 francs per cumprar defibrillaturs per l'implant da temp liber Vial e la chasa da scola Caguils.
Ed il cussegl ha decis da metter en vigur retroactiv per l’emprim da schaner 2016 il reglament da gestiun, indemnisaziun e chasti da l’uniun da pumpiers Domat/Ems – Favugn.
