La proposta è vegnida dal cussegl da la citad da Cuira. La citad è numnadamain en las stretgas quai che pertutga la tgira d'uffants ordaifer la famiglia. Ils centers dal di per uffants èn fullanads e per construir novs bajetgs na tanscha il temp betg. Il parlament da Cuira ha decidì che da metter in container sin l'areal da la scola Rheinau en il quartier Giacometti saja la schliaziun la pli simpla.
Betg bunmartgà
La citad da Cuira sto trair ils raps or da satg per finanziar quest project. 1,6 milliuns francs èn previs per l'installaziun da quest container. Per ils adversaris da l'idea è questa schliaziun intermediara memia chara. Tuttina ha il parlament decidì da suandar la proposta dal cussegl da citad. Sche tut va sco previs duai il container esser pront sin l'october 2016.