En il teater va quai per ina insla cun ina tur da sun, che po sulet surviver sch’ella tuna bain. Per quai guarda «Letra», ina dunna, che ramassa ils tuns per la tur. In di turna enavos «Dezibel», in um, ch’è stà bandischà da l’insla e che vul ussa midar l’intent da la tur. «Marto», il maister da la tur vesa quai, per las duas guardias da la tur na para quai betg dad esser uschè mal.
Per ch’ì na dettia betg dapli donns, sto «Letra» uss far or da l’insla ina plazza nua che tuts sa sentan bain.
Giubileum d’85 onns ProCap Grischun
Il teater è vegnì scrit aposta per l’85avel anniversari da la «ProCap» e quai dal autur Vincenzo Todisco. En il center da l’istorgia è la sensibilisaziun per glieud cun in impediment. Ils diesch acturs èn tuts amaturs e han era tuts in impediment. En pli èn era duas giuvnas sautunzas en acziun. La reschia maina la pedagoga da teater Justina Derungs.
Era sche ti n‘audas e vesas nagut, ti vegns a sentir, quai la quintessenza dal toc da teater.
Bleras sfidas enfin che las emprovas pon cumenzar
Las provas per quest teater han lieu in ina gronda halla en il quartier d’industria a Zezras quai amez las caneras da las ufficinas d’enturn. Ma quai è sulet ina da las sfidas tranter bleras. Er chaussas sco transports dals acturs ni era bleras uras da lavur ed ina culissa plitost speziala sun part da questas sfidas. Er il teater savess è vegni midà ferm per che quai saja insumma pussaivel da preschentar el sin il palc.
Emprima preschentaziun ils 22 d’october
La prima da las total sis producziuns giugadas en la «Postremise» a Cuira ha lieu ils 22. October 2016. Per persunas surdas ni talas che n’audan betg uschè bain vegn installada in apparat d’inducziun. Ina da las sis represchentaziuns vegn perfin translatada simultan en la lingua da segns.
RR actualitad 17:00