L’onn passà era vegnida manada atras la davosa giada l’exposiziun d’atun Gehla. Silsuenter era vegnì ord la Gehla la Guarda cun novs chaus ed in nov concept.
Marco Engel, in dals manaders da la Guarda, declera las raschuns per las qualas i na dat quest onn nagina'exposiziun.
Cler è che l’exposiziun vegn menada atras l’emprima giada il 2017. Quai dils 1 fin ils 5 da november.
I vess cutizzà fitg da manar atras gia quest onn l’emprima ediziun da la Guarda di il manader Marco Engel. Ma probabel vessan blers lura ditg che la Guarda saja simplamain ina nauscha copia da la Gehla. I dettia numnadamain grondas midadas tar l’exposiziun d’atun. Ella vegn structurada enturn cumplettamain.
Il Grischun en il focus da la Guarda
Il chantun Grischun duai vegnir mess en il focus. Tenor Marco Engel duessi dar in’exposiziun da Grischuns per ils Grischuns.
Da preschentar uschia gia l’atun 2016 l’exposiziun nova cun il concept nov na fissi betg realistic. Tenor Marco Engel hajan blers expositurs gia mussà lur interess per la Guarda 2017.
RR novitads 12:00