Tar ils fauturs dumbran dasper il comité era Claustra Turissem, l'uniun da commerzi e mastergn, l'uniun d'hoteliers ed era la cuminanza d'interess «agricultura». Quai han els communitgà a l'orientaziun da medias.
Era la suprastanza communala ed il cussegl communal recumondan da votar cun gea.
Schanza economica
Il project da 90 milliuns francs muntass ina gronda schanza per l'economia ed il commerzi da la regiun, di il comité da sustegn. In gea a l'urna avria la via per la construcziun d'in hotel da tschintg stailas cun varga 100 chombras, wellness, restaurant, sala da bal ed infrastructura per congress. Plinavant tutgan era tar il project 300 parcadis sutterrans.
Il favrer da quest onn ha la populaziun da Claustra-Serneus decidì da duvrar l'areal Montana economicamain e turisticamain. Dapi lu ha la vischnanca e l'interpresa, Immoville SA da Claustra, elavurà contracts per realisar il project.
Il project ha dentant er adversaris
Er il comité cunter il project hotel Montana ha communitgà il glindesdi ses arguments. Las cundiziuns per la vendita dal sulom, la midada da zona, il parcadi sutterran e l'hotel sajan cumplettamain inacceptablas. Tenor ils adversaris è il contract tranter la vischnanca da Claustra e la sviluppadra dal project memia ferm drizzà ora sin ils investurs. Ils ristgs per ils pajataglias sajan pervia da quai memia gronds.
RR actualitad 17:00
