A Cuira hai dentant dà ina zona tar la Quaderwiese, nua che mintgin ha pudì laschar ir sias rachetas. Ils pumpiers da Cuera han surveglià la festa naziunala da Cuira ensemen cun la polizia da la citad.
Natiralmain haja la plievgia sminuì ils ristgs d’incendis, ha ditg Manuel Lendi, il chau-secziun dals pumpiers da Cuera. Dasper il privel d’incendis da guauds dettia quai dentant auters privels, per exempel il privel che fieus artifizials pericliteschian aspectaturas ed aspectaturs.
Zona dedicada a fieus artifizials
Betg tut las rachetas e vulcans funcziuneschian numnadamain adina sco quai ch’ì duessan. Per exempel dettia quai adina puspè rachetas che schluppentian memia svelt ni rachetas che midian tuttenina la direcziun da sgol. Consequentamain hajan ils pumpiers endrizzà ina zona speziala cun bandas per laschar ir fieus artifizials.
2 equipas da pumpiers han procurà per la segirezza
Per pudair evitar incaps cun fieus artifizials ed incendis uschè lunsch sco pussaivel haja quai dà 2 equipas da pumpiers. L’ina è ida sin patruglia cun in vehichel atras Cuira. L’autra è restada sin la Quaderwiese ed ha observà la zona endrizzada spezialmain per laschar ir fieus artifizials.