Legenda:
Il lieu da l'accident sin la via tranter Tschappina ed Urmein.
mad
cuntegn
Ulteriur Grischun - Urmein: Skateboarder da downhill sa disgrazia
Suenter ina collisiun cun in auto è mort la sonda saira in skateboarder da downhill sin la via tranter Tschappina ed Urmein. Quai communitgescha la polizia chantunala.
«fäG» è l'abreviaziun tudestga per «urdains sumegliants a vehichels».Tenor il Post da consultaziun svizzer per la prevenziun d'accidents bfu sa tracta da vehichels cun rodas u rollas, che vegnan muventads mo cun la forza da l’agen corp. Cun els dastgan ins ir sin tschertas vias, uschia p.ex. sin vias lateralas cun pauc traffic e senza trottoir.
Il skateboarder talian (23) era en viadi cun ina gruppa sin la via laterala da Tschappina ad Urmein. En ina storta a dretga è el collidà sin il vial oppost frontalmain cun in auto ch’è vegnì encunter. Malgrà il prim agid dad in team d’ambulanza da Tusaun e da la Rega è l’um giuven mort anc al lieu da l’accident. Las autoritads han clamà il Care Team Grischun sin il lieu per sustegnair las persunas preschentas.
Il skateboard da downhill tutga tar la categoria dals uschenumnads «urdains sumegliants a vehichels» fäG en l’abbreviaziun duvrada per tudestg, scriva la polizia en sia communicaziun.
La procura publica e la polizia chantunala dal Grischun investigheschan l’accident.
