La legislatura da la citad da Cuira va a fin quest onn, temp per far cumbat electoral. La stad elegian ils da Cuira in nov parlament ed in nov cussegl da la citad. Ed uschia er in nov president u reelger il president actual. Urs Marti vul numnadamain restar. Las finamiras ch'el haja mess avant quatter onns haja el pudì realisar. I saja semnà, uss saja da guardar che quai creschia er bain. Tranter auter vuleva el cunzunt dumagnar Cuira ord las cifras cotschnas. Quai saja grategià. Ed er l'augment da la populaziun saja grategià.
Novas finamiras per la proxima legislatura
Tuttina less il liberaldemocrat er en il futur prender en maun novas finamiras. Tranter auter è la segirtad da la chapitala impurtanta per el. Cunzunt la staziun na duai betg daventar in «hotspot» nua ch’ins sa sentia betg segir. Perquai vul el er en il futur investir en la segirtad.
Candidats Cussegl da la citad da Cuira
-
Bild 1 von 7. Salome Mathys dals verd-liberals vul prender plaz da nov en il cussegl da la citad da Cuira. Bildquelle: mad.
-
Bild 2 von 7. Patrik Degiacomi candidat da la PS per il Cussegl da la citad. Bildquelle: mad.
-
Bild 3 von 7. Tom Leibundgut vul restar en uffizi. El candidescha per la glista verda independenta. Bildquelle: RTR, G. Hosang.
-
Bild 4 von 7. Hanspeter Hunger candidat da la PPS per il Cussegl da la citad. Bildquelle: mad.
-
Bild 5 von 7. Peter Portmann candidat da la PCD per il Cussegl da la citad. Bildquelle: mad.
-
Bild 6 von 7. Marco Tscholl candidat da la PBD per il Cussegl da la citad. Bildquelle: RTR, I. Orlik.
-
Bild 7 von 7. Urs Marti dal PLD candidescha per ina ulteriura perioda sco president da la citad. Bildquelle: SRF.
Vinavant uschia!
Sut il stritg vala dentant il slogan: Vinavant uschia! I valia da vinavant spargnar, vinavant rinforzar l’economia e vinavant carmalar glieud en la chapitala. Cuira duai daventar uschè attractiv sco pussaivel.