Il parlament da Cuira ha decis cun 13 cunter 5 vuschs e 2 abstenziuns da sustegnair cun 600'000 francs in museum per il stgazi da la catedrala e las tavlas da la mort da Cuira.
Il museum è calculà cun 7,8 milliuns francs e vegn ad esser situà en il chastè da l’uvestg. En il museum duessan vegnir mussadas las reliquias ed ils objects liturgics dal stgazi da la catedrala ed er las tavlas da la mort dal 16avel tschientaner.
Anc il november passà aveva il parlament refusà il credit cun differents arguments. Ed er questa giada han ils commembers da la partida liberaldemocratica e parts da la partida populara detg NA a la contribuziun da 600'000 francs per il museum planisà.
Decisiun Obere Au
Plinavant ha il parlament da la citad decis da bajegiar ina segunda plazza da ballape artifiziala sin l'Obere Au. La plazza vegn a custar radund 2,4 milliuns francs e fa part dal plan da basa sport da la citad. Il parlament ha en quest connex refusà la proposta or da las retschas da la PPS da laschar vuschar la populaziun davart il credit per la nova plazza da ballape.
RR actualitad 07:00
