Datiers da la chapella St. Maria Magadalena a Dusch sur Pasqual è la fin d'emna vegnì lavurà. Quai en favur da la biodiversitad. Il territori da protecziun Dusch è numnadamain in prà sitg, nua ch'ins vul evitar ch'in guaud crescha. Tut en tut ha la zona da protecziun da la Pro Natura a Dusch ina surfatscha da bunamain 5000 m2.
Uschia han 11 voluntarias e voluntaris sut la batgetta da la Pro Natura stgarpà or chaglias e chaglioms sin il prà sitg per dar spazi a spezias periclitadas, per exempel a l'anemona da muntogna. Quella flura è sin la glista da flurs periclitadas. Tut quai che vegn stgarpà or resta en la zona da protecziun. Ils voluntaris furman cun quest lain rumì mantuns – en emprima lingia per dar refugis, spazis vitals a reptils.
-
Bild 1 von 6. La naiv na disturba betg ils voluntaris. Cunquai ch'il sulegl stgauda fitg è quai betg problem. Bildquelle: RTR, Pietro Jacomet.
-
Bild 2 von 6. En emprima lingia vai per la protecziun da l'anemona da la muntogna (pulsatilla montana). Bildquelle: RTR, Pietro Jacomet.
-
Bild 3 von 6. Tut en tut èn 11 voluntaris stà a Dusch per «schubregiar» il prà magher. Bildquelle: RTR, Pietro Jacomet.
-
Bild 4 von 6. Quai che vegn stgarpà or vegn mess ensemen tar mantuns. Uschia creeschan ils voluntaris spazis vitals per animals pitschens. Bildquelle: RTR, Pietro Jacomet.
-
Bild 5 von 6. Giusep Blumenthal da Domat era pli baud alpinist – ed anc oz è la natira in da sias grondas passiuns. Bildquelle: RTR, Pietro Jacomet.
-
Bild 6 von 6. La spunda sur Dusch, nua che 11 voluntarias e voluntaris han la sonda passada lavurà en favur da la biodiversitad. Bildquelle: RTR, Pietro Jacomet.
- Dapli dal project «Missiun B».
- Registrai Vossa surfatscha biodiversa sin missiunb.ch.
- As participai a nossa gruppa sin Facebook.
RR actualitad 07:30