Il proxim temp vegnan il president da la «Pfadi Chur» Frank Schuler e Christoph Trüb ad avair bler da far. Differents acts festivs han gia cumenzà il mars e sco proxim organiseschan els in'exposiziun en la gallaria da la citad a Cuira. Vitiers vegn anc in cudesch da giubileum che lascha dar in sguard enavos sin ils ultims 100 onns. La finamira èsi da mussar, co ils battasendas èn sa midads e tge ch'è restà tochen ozendi. Ina finamira vegn era ad esser da carmalar glieud giuvna da s'engaschar tar ils battasendas.
100 onns battasendas Cuira – ina lunga istorgia
Tut ha cumenzà ils 9 da mars 1918. Quai è stà il di da la fundaziun da l'emprima uniun da battasendas en il Grischun. Il fundatur Christian Simmen aveva appellà cun in simpel inserat en la gasetta als giuvenils da sa participar en ina gruppa. L'idea da far uschè ina gruppa n'era dentant betg vegnida da Christian Simmen sez, mabain da la societad d'uffiziers da Cuira ch'aveva surdà ad el l'incumbensa. Gia l'emprim di eran s'annunziads radund 40 mats per sa participar a la gruppa. En ils onns 1960 e 1980 è il dumber da commembers creschì sin radund 200 battasendas. Oz dumbran els 100 battasendas activs.
La gruppa aveva en ils emprims onns plitost in flair militar. Las acziuns, las rimnadas e l'ierarchia sumegliavan fitg a quellas da l'armada. Quai è restà uschia enfin tar la segunda guerra mundiala. Silsuenter è vegnì mess en il focus plitost il sport. Ozendi vai per esser en la natira e far activitads da cuminanza.
100 onns èn passads – ed il futur?
La digitalisaziun è segir stada in dals motivs, pertge ch'il dumber è stagnà sin actualmain 100 battasendas. Ils giuvenils han per part pli grond interess vi da telefonins e computers. Frank Schuler di: «Nus stuain s'adattar, dentant èsi impurtant da tegnair l'utilisaziun sin in minimum.» El è persvadì, ch'i vegn anc en 100 onns a dar ils battasendas. In «master–plan» per mantegnair l'uniun n'è betg planisà. Per el èsi impurtant ch'ils uffants han plaschair vi da las activitads e che quai vegn era ad esser en il futur in punct central.
RR actualitad 08:00
