Il fieu saja rut ora en in’abitaziun en il 18avel plaun, en tut ha la chasa auta 21 plauns, scriva la Polizia chantunala. Ina persuna blessada saja l’abitanta da l’abitaziun pertutgada, la segunda abitescha in’auzada pli aut. Omaduas persunas han ins transportà pervi d’ina probabla tissientada da fim en l’Ospital chantunal.
Bleras persunas evacuadas
En tut èn 65 persunas vegnidas evacuadas u han bandunà independentamain il bajetg. En acziun èn stads tut ils 50 pumpiers da Cuira, ensemen cun la polizia chantunala, la polizia da la citad e la Rega.
Abitaziun betg pli abitabla
La gronda part dals abitants han en il fratemp puspè pudì turnar en lur dachasa. Ils abitants da las abitaziuns da manaivel da l’origin dal fieu pon turnar en il decurs dal di. L’abitaziun pertutgada n’è il mument betg pli abitabla, ella è brischada or cumplettamain. Quant grond ch’il donn è, na po la polizia chantunala anc betg inditgar.
RR Novitads 11:30
