24‘000 nars al tschaiver da Cuira
- Actualisà Glindesdi, 8.2.2016, 7:14
La sonda han ils fans da tschaiver surpiglià la chapitala dal Grischun. Per la 39avla giada è stà il cortegi da tschaiver tras la citad da Cuira, quest onn sut il motto «As goht Poscht ab». La Polizia da la citad fa per tut la fin d'emna ina bilantscha positiva.
Confettis e guggas - tschaiver a Cuira
Il motto per l’onn 2016 è vegnì elegì perquai ch’i saja vegnì bajegià, structurà, serrà e renovà l’onn passa pliras interpresas en la citad.
Fin d'emna senza gronds incaps
Radund 24’000 aspectaturas ed aspectaturs hajan guardà las 51 furmaziuns che han fatg part al cortegi, scriva la Polizia chantunala. Tenor in communitgà da la Polizia da la citad Cuira saja stada la fin d'emna da tschaiver in eveniment paschaivel.
Tschaiver a Cuira
1:21 min, Actualitad dals 08.02.2016
La polizia da la citad è stada totalmain 30 giadas en acziun, quai cunzunt pervi da donns materials e violenza. En ils cas menziunads sajan las persunas pertutgadas stadas alcoholisadas fermamain.
Sutvart chattais vus intginas impressiuns dal cortegi dals 6 da favrer.
Impressiuns dal tschaiver da Cuira 2016
-
Tschuettas cun trumbettas: quests exemplars stgars chatt'ins be durant la 5avla stagiun da l'onn. RTR, S. Degonda
1/11 -
Avieulus Curiensis: in pitschen exemplar da l'insect periclità - e ch'ins chatta be da tschaiver. RTR, S. Degonda
2/11 -
Porschan divertiment musical per tuts: las uschenumnadas guggas, las gruppaziuns musicalas da tschaiver. RTR, S. Degonda
3/11 -
Tantas paucas fan canera: ils «Burgfätzer» da Malix durant il cortegi. RTR, S. Degonda
4/11 -
Blera lavur da construcziun per las strias en lur chasa. RTR, S. Degonda
5/11 -
Sa tgi? Ins n'enconuscha betg la persuna ch'impersunescha la stria. RTR, S. Degonda
6/11 -
Èn oz giasts a Cuira: la gruppaziun «haub-haub» da Langenthal. RTR, S. Degonda
7/11 -
Pitschen e grond: da tschaiver è la vegliadetgna ina chaussa secundara. RTR, S. Degonda
8/11 -
Er senza naiv e glatsch: ina gruppa d'uffants è sa costumada sco urs da glatsch. RTR, S. Degonda
9/11 -
In char plain nars. Quai è forsa insatge ch'ins chatta er ordaifer dal tschaiver. RTR, S. Degonda
10/11 -
In dals nars... el cua ualti segir ora ina filistucca :) RTR, S. Degonda
11/11
