Il stadion actual datescha da l'onn 1979 e n'ademplescha betg pli las pretensiuns da segirtad. L'Assicuranza d'edifizis dal Grischun pretenda surtut meglras pussaivladads da fugir en cas d'urgenza.
Architect Marques: «Il plastic sto davent»
Vid la furma dal stadion na vuless l'architect Daniele Marques midar nagut. La fatschada perencunter, cun ils elements da plastic, vegn remplazzada cun elements da lain e da betun. Plinavant duai dar ina entrada principala en il nord. Cun in'entrada pli pitschna en il sid per ils fans d'ordaifer saja il stadion er pront per gieus da hockey da risico, uschia l'architect da Lucerna vinavant.
Construcziun da lain resta
La construcziun da lain saja caracteristica per il stadion e duai restar. Per che la glieud possia fugir en cas d'urgenza duajan sulers pli gronds garantir dapli segirtad. Nov è er ina sort suler enturn il stadion - là vegn purschì da baiver e da mangiar e davent da quest suler cuntanschan ils fans ils differents secturs.
Il nov stadion duai porscher dapli plazs da seser e pli paucs plazs da star en pe. Quai saja en il trend hai gì num oz durant la preschentaziun a Tavau. En tut duai il stadion renovà porscher plazza a bunamain 6'600 persunas - levet damain ch'actualmain.
Tarzisius Caviezel: "Tavau po sa prestar quai"
Anc avant insaquants onns n'avessi la vischnanca betg pudì finanziar ina tala renovaziun, ha concedì il president da Tavau, Tarzisius Caviezel.
Actualmain na saja quai betg in problem d'investir 25 milliuns francs. Ina part dals daners ha la vischnanca gia mess d'in maun ils ultims onns - l'autra deriva d'in fonds ord taxas da cura. Plinavant spera Caviezel da survegnir ina contribuziun da 5 milliuns francs dal chantun. Sco proxim tracta il parlament da Tavau la fatschenta ed ils 24 da settember votescha il suveran da Tavau en chaussa.
Pli paucs gieus dal HCD a chasa
Il stadion renovà duai esser en funcziun l'onn 2021 - gist sin il giubileum da 100 onns dal Club da hockey da Tavau. Durant la renovaziun sto il club dentant adattar ses plan da gieus: Il cumenzament da la stagiun dat il HCD tut ils gieus ordaifer e cumenza pir il november cun ils gieus a chasa.
Quai na saja atgnamain nagin problem, di il president Gaudenz Domenig. El quinta dentant cun pli paucas entradas da bigliets per las stagiuns durant la renovaziun.
RR novitads 14:00++
