Quest onn festivescha la bursa da velos da Cuira ses 25avel anniversari. Adina da la partida, gia dapi il cumenzament, è Markus Willi da Cuira. El fa lavur voluntaria a la bursa. Markus Willi è inschigner electric e lavura sco magister en la scola professiunala a Cuira. El è adina s'engaschà per questa bursa. E betg mo el - cun il temp ha si'entira famiglia cumenzà a lavurar per la bursa da velos da Cuira.
Velocipedist ord persvasiun
Marcus Willi na posseda nagin auto. El è velocipedist ord persvasiun. Per charrar en la citad da Cuira saja quai il med il pli pratic, di Willi. Si'entira famiglia giaja fitg gugent cun velo. Durant la bursa a Cuira midan radund 1000 velos lur possessur.
La 25avla ediziun da la bursa da velos a Cuira è sonda, ils 12 da mars en la halla HA da l'areal militar a Cuira.