5 onns City West a Cuira – ina bilantscha

Ils 11-11-2011 è vegni avri il pli grond center da cumpras en Grischun, il City West. In mez onn pli tard èn las abitaziuns ed ils biros vegnids averts, ed anc in mez onn pli tard ha er il hotel «City West» avert sias portas.
Ma han tut quels insumma success? Ina bilantscha.

Sursiglir cuntegn supplementar

Las abitaziuns en cifras

En las dus turs cun mintgamai indesch plauns èn 72 abitaziuns. Quellas han ina grondezza da 2,5 fin 4,5 stanzas. Il pretsch: Da 1’450 fin radund 2’400 francs, tut tenor grondezza ed extras sco p.ex. garascha.

Las abitaziuns èn bain occupadas

Tenor il manader da «Domenic Immobiglias» Jakob Gross sajan dapi l’avertura da las abitaziuns pli u main adina tuttas stadas occupadas.

Il motiv è tenor el il conturn dals sgrattatschiels: Las pussaivladads per far cumissiuns èn pli u main direct sut il palantschieu. En pli saja il sguard sur la citad da Cuira e sur la cuntrada fitg bel.

Sursiglir cuntegn supplementar

Ils biros en cifras

Ils otg biros èn partids si tranter il diesch- ed il 13avel plaun en mintgina da las turs. Els han ina grondezza da 111 enfin 235 meters quadrats. Pretsch per meter quadrat è ca. 220 francs.

Ils biros datti inclusiva giavischs

Era ils biros eran svelt dà a fit. Ils fittadins pudevan perfin inoltrar lur giavischs. Per Gross la raschun principala daco ch'ils biros eran svelt plains. Tranter ils fittadins èn in’agentura da reclama ed ina pratica da medi.

L'hotel n'ha marscha betg uschè bain

Tar l'occupaziun da las stanzas d'hotel na guardi però betg ora uschè bain. Il mument èn radund 25 chombras occupadas. La mira da la manadra da l’hotel, Christin Benz, è in’occupaziun permanenta da radund 80%.

Per arrivar a quella mira vul ella far reclama cun inserats en gasettas ed online. Il manco da giasts haja da far tenor Christin Benz cun sia antecessura che na fascheva betg avunda reclama. Cun Christin Benz duai uss però trair in auter vent.

Las stanzas da seminaris e la halla d’event

La dumonda per ils dus locals saja relativamain gronda. Christin Benz sa declera quel success cun l'equipament. A Cuira na dettia betg uschè bleras hallas cun in talmain bun equipament, perquai sajan la stanza da seminaris e la «Eventhall » uschè dumandadas.

RR actualitad 11:00