La sonda hai dà sin la A13 sin l'autezza da la staziun da La Punt/Rehanau ina collisiun frontala tranter dus autos ed ina collisiun da davos cun in ulteriur auto. In automobilist da 58 onns che vegniva da Cuira è collidà frontal cun in automobilist che vegniva da Tusaun. Sco la Polizia chantunala scriva n'èsi betg cler, co ch'igl è vegnì tar quella ferma collisiun. L'automobilist dad 83 onns che charrava suenter l'auto en direcziun sid, n'è betg pli vegnì d'evitar ina collisiun da davos.
Tar l'accident èn nov persunas vegnidas blessadas – intginas fermamain. Ellas èn vegnidas transportadas en ils ospitals chantunals a Cuira e Son Gagl sco er en l'ospital a Schiers.
L'autostrada A13 è stada serrada durant trais uras e mesa pervi da l'accident. Il traffic è vegnì svià sur la Via taliana H13.