Siglir tar il cuntegn

Header

audio
Saira: Grev accident cun dus morts sin la Landquart
Or da Actualitad dals 27.05.2016.
laschar ir. Durada: 1 minuta 6 Secundas.
cuntegn

Ulteriur Grischun Accident da bartga - i na vegn betg pli tschertgà

La tschertga suenter l'um spari tar l'accident da bartga en Partenz è vegnida terminada senza success. Pir tar indizis concrets tschertgan las forzas da salvament vinavant.

Malgrà la tschertga intensiva da las forzas da salvament ensemen cun Rega, chauns, sfunsaders ed il Club alpin svizzer n'haja ella betg gì success. Quai ha respundì il pledader da la polizia chantunala Marcus Corai ad RTR.

Sche quai na dettia nagins indizis concrets alura na vegnia la tschertga betg pli reprendida. La Landquart sco er il Rain mainian il mument fitg blera aua.

Anc fin la sonda da mezdi era vegnida tschertgada la persuna sparida, in um da la Republica Tscheca da 66 onns. El appartgnaiva ad ina gruppa privata ch'è disgraziada il venderdi cun lur bartga da gumma sin la Landquart.

La polizia e la procura publica investigheschan il cas.

L’impurtant en furma concisa

  • venderdi, curt avant las 13:00: ina bartga da gumma è cupitgada sin la Landquart
  • 2 umens (60 e 66 onns) èn morts
  • 2 persunas èn blessadas
  • 2 persunas èn sa spendradas
  • sonda bun'ura: 1 um (66) sparì vegn anc tschertgà
  • i sa tracta dad ina gruppa da la Republica Tschecha
  • polizia e procura publica intercurreschan
  • la raschun per l'accident n'è anc betg clera

Curt avant las 13:00 haja ina dunna vis vestas da nudar, ina chapellina ed ina bartga da gumma cupitgada datiers da Schiers sin la Landquart. Ella ha lura alarmà la Polizia chantunala.

En acziun eran diversas patruglias da las Polizias chantunalas dal Grischun e da Son Gagl sco er la polizia dal Principadi dal Liechtenstein.

Mort malgrà reanimaziun

Tenor emprimas enconuschientschas era ina gruppa da diesch persunas ida a bord da duas bartgas privatas a Küblis. Tranter Küblis e Fideris è la bartga davant cupitgada. En la bartga eran tschintg persunas.

Duas persunas han pudì sa spendrar sezzas. Ina persunas ha pudì vegnir spendrada ord la Landquart da las forzas d’agid tranter Schiers e Grüsch. Malgrà reanimaziun è questa persuna morta.

Ina segunda persuna è vegnida spendrada ord il Rain a Maienfeld. Ella è vegnida reanimada, ma era morta al lieu. Ina terza persuna è anc sparida.

Ultra da quai en acziun:

  • ambulanzas dals ospitals Schiers e da l’Ospital chantunal dal Grischun
  • equipas da pumpiers dal Partenz, da Landquart, da Buchs (SG), da Sargans (SG) ed il salvament d’aua da la polizia dal Liechtenstein
  • CAS - Club alpin svizzer
  • Rega cun dus helicopters
  • Swisshelicopter cun in helicopter

Las equipas spezialas cumpiglian sfunsaders, manaders da chauns e manaders d’acziun sgulants. Per l’assistenza dals ulteriurs commembers da la gruppa da bartgas da gumma era il Care Team Grischun al lieu.

RR novitads 17:00++

Artitgels legids il pli savens